Psa 13 | NOP | STEP | Yahwe, nai deniŋ kotigoŋ nadinambaaŋ? Be agaŋ binabudapmaŋ hinek-kube tilaŋ? Be nai dedigoŋ hinek sigilulum tinambaaŋ?

Psalms 13

Dewit adi Bepaŋdi tubulodawek yoŋa ninadi tuguk

1 Yahwe, nai deniŋ kotigoŋ nadinambaaŋ? Be agaŋ binabudapmaŋ hinek-kube tilaŋ? Be nai dedigoŋ hinek sigilulum tinambaaŋ? 2 Nai deniŋ hinek folofigitane dapmawaak? Be helebufa dedigoŋ hinek welemulap nadiwaat? Be nai dedigoŋ hinek binabune memikneyedi nehitifoneeŋ?

3 O Yahwe, Bepaŋne, nutok nadinamuŋa yonadine nadiweŋ. Tiŋa kotigoŋ nehitubu-kilitiune kumuŋ mu tibit. 4 Unduŋ tubune memikneyedi indiŋ tuwot mu yoneŋ, “Agaŋ yalitifooŋ kalakapmemun.” Du mu binabeŋ, toboniŋ nehitubu-lodaune memikneyedi naniŋgege tiŋa nadifo tuwot mu tineŋ.

5 Du welegedi hinek nabukahilelaŋ u helemahelemaŋ unduŋ hinek nadisukilitilat. Tiŋa du kotigoŋ nanagilaaŋ doktiŋa nu nadifo tilat.

6 Yahwe negoŋ momooŋ hinek tinamguk doktiŋa nu kap toŋa nadifooŋ wou nintiloit.